මහින්ද දේශපාලන අනාගතය උකස් තියන්න යයි - අමාරු තීන්දු ගන්න සූදානම් බව කියයි
ජනප්‍රිය තීන්දු වෙනුවට අමාරු හා අසීරු තීන්දු ගැනීමට සිදුවන යුගයකට වත්මන් ආණ්ඩුව එළඹ ඇති බවත්, එම තීරණ ගැනීමට සිදුවන්නේ දේශපාලන අනාගතය උකස් කරමින් බවත්, අග්‍රාමාත්‍ය මහින්ද රාජපක්ෂ මහතා පවසනවා.
එසේ වුවත් රට හා රටේ අනාගතය වෙනුවෙන් ඒ අමාරු තීන්දු ගැනීමට රජය සූදානම් බව ද අග්‍රාමාත්‍යවරයා සඳහන් කළා.
රජය එවැනි තීන්දු ගන්නා විට මාධ්‍යයන් ද රට වෙනුවෙන් ඉතා වගකීමෙන් කටයුතු කරනු ඇතැයි සිතන බවයි හෙතෙම සඳහන් කළේ.
අගමැතිවරයා මේ බව පැවසුවේ ජනමාධ්‍ය අමාත්‍යාංශය මගින් ජනමාධ්‍යවේදීන් සඳහා හඳුන්වා දුන් ‘ඇසිදිසි මාධ්‍ය රක්ෂණාවරණය’ ව්‍යාපෘතිය යටතේ මාධ්‍යවේදීන් හට රක්‍ෂණ ඔප්පු ප්‍රදානය කිරීම සඳහා අරලියගහ මන්දිරයේදී ඊයේ (02) පැවති උත්සවයට එක්වෙමිනි.
මාධ්‍යයට ආණ්ඩු බලයට ගෙන්නට මෙන්ම, ආණ්ඩු පෙරළන්නත් හැකි බව කී අගමැතිවරයා එසේ වුවත් මාධ්‍යයට ආණ්ඩු රකින්නට නොහැකි බව කියා සිටියා.
ආණ්ඩුව රැකගත හැක්කේ ආණ්ඩුව කරන අයට පමණක් බවත් මාධ්‍යය විසින් ආණ්ඩුව රකින්නට ගියොත් ඔවුන්ට මීට වඩා ලොකු රක්‍ෂණයක්දීමට සිදුවන බවත් මහින්ද රාජපක්ෂ මහතා ප්‍රකාශ කළා.
අගමැතිවරයා මෙසේද සඳහන් කළා.
‘‘මාධ්‍යට ආණ්ඩු හදන්න පුළුවන්. ආණ්ඩුවක් බලයට ගේන්න පුළුවන්. හැබැයි මාධ්‍යට ආණ්ඩු රකින්න බෑ. ආණ්ඩුව රැකගන්න පුළුවන් ආණ්ඩුව කරන අයට විතරයි. මාධ්‍ය ආණ්ඩුව රකින්න ගියොත් මාධ්‍යට මීට වඩා ලොකු රක්ෂණයක් දෙන්න වෙයි. ඒක මාධ්‍යවේදීන් තේරුම් ගත්තාට අපේ අය තේරුම් අරගෙන නෑ වාගේ කියලා මට හිතෙනවා.
වෘත්තීය වශයෙන් නීතිඥවරු ඇරුණාම මම වැඩිපුරම සමීප උනේ මාධ්‍යවේදීන්ට. මට මතකයි එදා, මම මන්ත්‍රී කණ්ඩායම් රැස්වීමකට එනකොට එදා ජනාධිපතිතුමිය කිව්වා ඔන්න රිපෝටර් එනවා කියලා. මම කිව්වා මම රිපෝටර් නෙවෙයි, එඩිටර් කියලා. මම පත්තරවලට තොරතුරු දුන්නේ සංස්කරණය කරලා. පක්ෂයටවත්, මටවත් හානි නොවන විදියට. ඒ නිසායි මම කිව්වේ මම එඩිටර් කියලා.
මාධ්‍යට යමක් හංගන්න හංගන්න රටේ ජනතාව ඒ ගැන තියෙන උනන්දුව වැඩියි. හංගන්න හංගන්න හැදෙන බොරු කතා වැඩියි. අද පාර්ලිමේන්තු සංවාද රූපවාහිනියෙන් විකාශය වෙනවා. හැබැයි කවුරුවත් ඒවා බලන්නේ නෑ. මොකද ඒක විවෘත නිසා. අද කැබිනට් එකට විතරයි මාධ්‍යවේදීන් යන්නේ නැත්තේ. ඒ නිසාම කැබිනට්ටුවේ වුණ දේවල් කියලා අමුතු අමුතු කතා ගොඩ නැගෙනවා. ඒක තමයි මාධ්‍යයේ හැටි.
අපේ ජීවිතේ දුෂ්කරම කාලවල මාධ්‍යවේදීන් අපිත් එක්ක හිටියා. අපිව බලයට ගේන්න මාධ්‍යවේදීන් ලොකු සේවයක් කළා. නමුත් දැන් අපි චෝදනා කරනවා මාධ්‍ය දැන් අපිත් එක්ක නෑ කියලා. මේක අමුතු දෙයක් නෙවෙයි. අපේ ජීවිත කාලය තුළ අපි අත්දුටු දෙයක්."
හැමදාම ආණ්ඩු මාධ්‍යට කළ චෝදනාවක් තමයි ආණ්ඩුවේ සංවර්ධන කටයුතු මාධ්‍යයේ දාන්නේ නෑ කියලා. රටේ වෙන හොඳ දේවල් පත්තරවල දාන්නේ නෑ කියන චෝදනාව හැමදාම තිබුණා. අපිට නෙවෙයි අනගාරික ධර්මපාලතුමාටත් ඒ ප්‍රශ්නෙ තිබුණා. එතුමා වතාවක් කිව්වා “රටේ කොපමණ හොඳ දේ වුණත් ඒවා පත්තරවල පළ වෙන්නේ නෑ. කරොංචි හාමි නොන්නො හාමිට පිහියෙන් ඇන්නොත් මේකා ඒක පත්තරේ මුල් පිටුවේම දමාපි” කියලා. ධර්මපාලතුමා එහෙම චෝදනා කළා. ඒ නිසා මාධ්‍යවේදීන්ට දොස් කියලා වැඩක් නෑ. ඒ කාලෙ ඉඳලාම මාධ්‍යවල හැටි තමයි ඒ.
මාධ්‍යට මේවා නොපෙන්වා බෑ. වාර්තා නොකර ඉන්න බෑ. හැබැයි මාධ්‍යයට නොතේරී මාධ්‍යයෙන් ප්‍රයෝජන ගන්නත් රටට එරෙහි බලවේගවලට පුළුවන් වෙලා තියෙනවා. මේවා රටට ආදරේ, වගකීමක් ඇති මාධ්‍ය තේරුම් ගන්න ඕනෑ.
ජනප්‍රිය තීන්දු වෙනුවට අමාරු, අසීරු තීන්දු ගන්න වෙන යුගයකට තමයි අපේ ආණ්ඩුව දැන් පත්වෙලා ඉන්නේ. ඒ අමාරු තීන්දු ගන්න අපි සූදානම්. රට වෙනුවෙන් ඒ තීන්දු ගන්න වෙන්නේ දේශපාලන අනාගතය උකස් තියලා. එහෙම තීන්දු ගන්නකොට රට වෙනුවෙන් මේ රටේ මාධ්‍ය ඉතාම වගකීමෙන් ක්‍රියා කරයි කියලා අපි හිතනවා."
No comments: