රූපවාහිනී විවාදවලින් ජවිපෙ කැපී යයි.. සජිත් හා රනිල් පිලට අවස්ථාව.. 3%ට අවස්ථාවක් දෙන්න බැරි බව නාලිකා කියති

රූපවාහිනී නාලිකාවල පැවැත්වෙන දේශපාලන සාකච්ඡා වලදී ජනතා විමුක්ති පෙරමුණට අවස්ථාව ලබා දීම ඉතාම සීමා කිරීමට හෝ නතර කිරීමට මෙරට සියලු රූපවාහිනි නාළිකා තීරණය කර ඇත.
ඊට හේතු වී ඇත්තේ දේශපාලන සංවාද වැඩසටහන්වල විපක්ෂයේ සම අවස්ථාවක් සමගි ජන බලවේගය සහ එක්සත් ජාතික පක්ෂය යන දෙපාර්ශවය විසින්ම දැඩිව ඉල්ලා සිටීමයි.


දැනට පැවැත්වෙන රූපවාහිණි සංවාද වැඩසටහන්වල ආසන හතරක් පමණක් පනවන අතර එම ආසන හතර ඔවුනට හිමි ජන ප්‍රසාදය අනුව ලබාදීමට එ් අනුව මෙරට රූපවාහිනි නාළිකා වැඩි ප‍්‍රමාණයක් තීරණය කර ඇත.

ඒ අනුව විපක්‍ෂය ලෙස සමගි ජන බලවේගය හා එක්සත් ජාතික පක්ෂයට ආසන දෙකක්ද ආණ්ඩුව නියෝජනය කරමින් ආසන දෙකක්ද ලෙස එම අවස්ථාවන් බෙදී යාමට නියමිතය.

මේ අතර මැතිවරණ කාලය තුළ තමනට රූපවාහිනී විවාදයන්ට සහභාගි වීමට අවස්ථාවක් දෙන්නැයි ජනතා විමුක්ති පෙරමුණ විසින් පුද්ගලික රූපවාහිනි නාලිකාවක් කිහිපයකින්ම ආයාචනා කර ඇති බවද වාර්තා වේ.

මේ සම්බන්ධයෙන් අප වෙත අදහස් පළ කළ රූපවාහිනී නාලිකාවක ප්‍රධානියෙක් කියා සිටියේ ආසන හතරක් පමණක් ඇති රූපවාහිනී දේශපාලන සාකච්ඡාවක එක් ආසනයක් වෙන් කිරීම දේශපාලන පක්‍ෂ ලබා ඇති ජනතා පදනම අනුව සිදුකරන බවයි.

ඒ අනුව 3%ක ජන පදනමක් පමණක් ඇති ජවිපෙට ආසනයක් ලබා දීමට නොහැකි තත්ත්වයක් උද්ගත වී ඇතැයිද ඔහු කියා සිටියේය.