ගෑස් අනතුරුවලට වන්දි ගන්නේ මෙහෙමයි; ලොක්කන්ට ''සාපරාධී නොසැලකිල්ල''ට අපරාධ නඩු

ගෑස් නිෂ්පාදනය කරන සමාගම් ගෑස් සංයුතිය වෙනස් කර ඇත්තේ නිසි ක්‍රමවේදය තුළ නොවේ නම් එම සමාගම්වලට එරෙහිව ''සාපරාධී නොසැලකිල්ල'' යටතේ අපරාධ නඩු පැවරිය හැකි බව නීතිඥ උපුල් කුමරප්පෙරුම මහතා පවසයි.

"අර ආයතනයේ ප්‍රධානියෙක් කිව්ව නේ ඒගොල්ලෝ මේකේ සංයුතිය වෙනස් කළා කියලා. එතකොට ඒ සංයුතිය වෙනස් කළේ නියම ක්‍රමවේදය ඇතුළේ නෙවෙයි නම්, ඒක නොසැලකිලිමත්ව කරලා තියෙනවා නම්, ඒ වගේ වෙලාවක මේකෙන් වෙන්න පුළුවන් හානිය ගැන මේ වගේ විධියට සංයුතිය වෙනස් කළාට පස්සේ වෙන්න පුළුවන් හානිය ගැන නොසැලකිලිමත්ව නිසි අවබෝධයක් අවධානයක් නැතිව කරන්නම් වාලේ කළා නම් එතන සාපරාධී නොසැලකිල්ලක් තියෙනවා. ඒ අනුව අපරාධ නඩුවක් පවරන්න පුළුවන්."

කුමාරප්පෙරුම මහතා පෙන්වා දුන්නේ, ගෑස් අනතුරුවලින් අගතියට පත්වුණු මහ ජනතාවට ද අදාළ සමාගම්වලට එරෙහිව නෛතික ක්‍රියාමාර්ග ගත හැකි බව ය.

"තුවාල වෙච්ච අය සම්බන්ධයෙන් වන්දි ඉල්ලන්න ත් පුළුවන්. සිවිල් නඩුවකින් හරි දේපළ අලභහානි වෙච්ච අයට වන්දි ඉල්ලන්න ත් පුළුවන්."

එමෙන් ම, අදාළ සිද්ධිය සම්බන්ධයෙන් පාරිභෝගික ආරක්ෂණ අධිකාරියට සෘජුව මැදිහත් වී ඒ පිළිබඳව නිසි විමර්ශනයක් සිදු කර එම ආයතනයට නඩු පවරා බලපත්‍රය අහෝසි කළ හැකි බව ද කුමාරප්පෙරුම මහතා පෙන්වා දුන්නේ ය.

"පාරිභෝගික ආරක්ෂණ අධිකාරියට ඒ ගොල්ලන්ට පුළුවන් මේක සම්බන්ධයෙන් සෘජු මැදිහත්වීමක් වෙලා මොකක් ද මේ ප්‍රශ්නය කියලා බලලා ඉවර වෙලා ඒ අදාළ ආයතනයට විරුද්ධව මොනවා හරි ප්‍රශ්නයක් තියෙනවා නම්, නඩු පැවරීමක් කරලා ඒකෙ ලයිසන් එක නවත්තන ත් පුළුවන්." 

කුමරප්පෙරුම මහතා වැඩිදුරටත් පෙන්වා දුන්නේ, මෙම සිද්ධිය සම්බන්ධයෙන් රජය මැදිහත් නොවූයේ නම්, මූලික අයිතිවාසිකම් කඩවීම යටතේ ඒ පිළිබඳව නීතිය ක්‍රියාත්මක කරන ලෙස ඉල්ලා අභියාචනාධිකරණයට රිට් අයැදුම් පතක් ගොනු කළ හැකිව තිබුණු බව ය.

"මේකට රජය මැදිහත් වෙන්නේ නැත්නම්, ජනතාවට අනතුරක් සිද්ධ වෙනවා නම් රජය අනිවාර්යයෙන් ම මේකට ක්‍රියාමාර්ගයක් ගන්න ඕනේ. නැත්නම් මිනිස්සුන්ගේ මූලික අයිතිවාසිකම් කඩවීමක් මෙතන තියෙනවා. මිනිස්සු ඉතා ම බරපතළ විධියට මේකෙන් පීඩාවට පත් වෙලා රජය ඒ සම්බන්ධයෙන් ක්‍රියාත්මක වෙන්නේ නැහැයි කියන පදනමේ ඉඳලා නීතිය ක්‍රියාත්මක කරන්න කියලා ඕන නම් ඉල්ලීමක් කරන්න අභියාචනාධිකරණයට රිට් අයැදුම්පතකුත් දාන්න පුළුවන්. මේකට විධිමත් පරීක්ෂණයක් කරලා, දෝෂයක් තියෙනවා නම්, හැබැයි දැන් කමිටුවක් දාලා නේ. ඒක නිසා ඒක ප්‍රශ්නයක් වෙන්නේ නැහැ. ඒක අදාළ වෙන්නේ නැහැ."

මූලාශ්‍රය - මව්බිම