ජනාධිපතිවරණය කල් දමනවාද.. තීරණය අද!

ජනපති ධූර කාලය සම්බන්ධයෙන් ව්‍යවස්ථාවේ ඇති අපහැදිත්වය නිරාකරණය කෙරෙනා තෙක්, ජනපතිවරණය පැවැත්වීම වලක්වන්නැයි ඉල්ලා ශ්‍රේෂ්ඨාධිකරණය හමුවේ ඇති පෙත්සම අද සලකා බැලීමට නියමිතයි.

එම මූලික අයිතිවාසිකම් පෙත්සම පංච පුද්ගල විනිසුරු මඩුල්ලක් හමුවේ අද (08) සලකා බැලීමට නියමිත අතර අගවිනිසුරු ජයන්ත ජයසුරිය මහතාගේ ප්‍රධානත්වයෙන් යුත් පංච පුද්ගල විනිසුරු මඩුල්ලේ සාමාජික විනිසුරුවරුන් වශයෙන් ශ්‍රේෂ්ඨාධිකරණ විනිසුරුවරුන් වන විජිත් මලල්ගොඩ, මුර්දු ප්‍රනාන්දු, ප්‍රීතී පද්මන් සුරසේන සහ එස්. තුරේරාජා මහත්වරුන් පත් කර ඇති බව වාර්තා වේ.

එම පෙත්සමෙන් පෙන්වා දී ඇත්තේ 19 වන ආණ්ඩුක්‍රම ව්‍යවස්ථා සංශෝධනයේදී ජනාධිපතිවරයාගේ ධුර කාලය දැක්වෙන 30/2 වගන්තිය ආණ්ඩුක්‍රම ව්‍යවස්ථාවේ 82/6 වන ව්‍යවස්ථාවට අනුව නියමිත ආකාරයට සංශෝධනයවී නොමැති බවත් ඒ සම්බන්ධයෙන් ශ්‍රේෂ්ඨාධිකරණයේ අර්ථ නිරූපණයක් ලබා දෙන ලෙසත්‍ ය.

මෙම පෙත්සම් විභාගය අවසන්වන තෙක් ජනාධිපතිවරණය සම්බන්ධයෙන් කිසිදු පියවරක් ගැනීමෙන් වළකින ලෙස මැතිවරණ කොමිසමේ සභාපතිවරයා, සාමාජිකයින් හා කොමසාරිස් ජෙනරාල්වරයාට නියෝග කරන ලෙසත්, ජනාධිපතිවරයාගේ ධුර කාලය වසර 6 ක් ලෙස සලකා ඉදිරි ජනාධිපතිවරණය පවත්වන ලෙස මැතිවරණ කොමිසමට නියෝග කරන ලෙසත් පෙත්සම්කරු විසින් එම පෙත්සමෙන් ඉල්ලා තිබේ.