ක්‍රීඩාව ගොඩගන්න රොෂාන් හිටපු ක්‍රීඩා ඇමතිවරු කැඳවලා! නාමල් විතරක් ඇවිත් නෑ!

ක්‍රීඩා ක්ෂේත්‍රය උන්නතිය සඳහා හිටපු ක්‍රීඩා ඇමතිවරුන්ගේ අදහස් හා යෝජනා ලබා ගැනීම සඳහා වත්මන් ක්‍රීඩා හා යෞවන කටයුතු අමාත්‍ය රොෂාන් රණසිංහ මහතා විසින් කැඳවා තිබිණි. 

මෙම සාකච්ඡාව සඳහා මහින්දානන්ද අලුත්ගමගේ, ගාමිණී ලොකුගේ, ලක්ෂ්මන් කිරිඇල්ල, ජීවන් කුමාරණතුංග, දයාසිරි ජයසේකර, නවීන් දිසානායක, ෆයිසර් මුස්තාපා, හරීන් ප්‍රනාන්දු යන හිටපු ක්‍රීඩා අමාත්‍යවරුන් සහ ජාතික ක්‍රීඩා සභාවේ සභාපති අර්ජුණ රණතුංග මහතා සහභාගි වී තිබේ.

විශේෂත්වය වන්නේ ගෝඨාභය රාජපක්ෂ රජයේ ක්‍රීඩා අමාත්‍යවරයා වූ නාමල් රාජපක්ෂ මහතා සාකච්ඡාවට සහභාගි නොවීමයි.

ජාතික ක්‍රිකට් කණ්ඩායම සහ ජාතික දැල්පන්දු කණ්ඩායම ආසියානු ශූරතා දිනා ගත්තේ නාමල් රාජපක්ෂ මහතා විසින් ක්‍රීඩාවට සිදුකළ අනුපමේය සේවය නිසා බව ඊයේ පැවති මාධ්‍ය හමුවකදී පොදුජන පෙරමුණේ පාර්ලිමේන්තු මන්ත්‍රී මධුර විතානගේ මහතා පවසා තිබිණි.

කෙසේ නමුත් නාමල් රාජපක්ෂ මහතා අද සාකච්ඡාවට සහභාගි නොවූ බැවින් නව ක්‍රීඩා අමාත්‍යවරයාට හිටපු ක්‍රීඩා ඇමතිගෙන් ක්‍රීඩාවේ උන්නතිය වෙනුවෙන් අගනා වටිනා උපදෙස් මාලාවක් ලබා ගැනීමට තිබූ අවස්ථාව අහිමි විය.