දයා ගමගේ ආයෙත් ඡන්ද නීති කඩලා !

සියයකට අධික සමෘද්ධි කළමනාකරුවන් අමාත්‍යාංශයට කැඳවා රුපියල්ල ක්ෂ දහය බැගින් වූ චෙක්පත් ඇමැති දයා ගමගේ අතින් බෙදාදීමට සැලසුම් කර ඇති බවට මැතිවරණ කොමිෂන් සභාව වෙත ලැබුණු තොරතුරකට අනුව, කොමිෂන් සභාවේ නිලධාරීහු පොලිසියද කැටුව ඊයේ (21දා) උදේ එම ස්ථානය වටලා තිබුණා.

ජනාධිපතිවරණයේදී මෙතෙක් අනාවරණය වූ මහා පරිමාණයේ මැතිවරණ නීති උල්ලංඝනය කිරීම්, ප්‍රාථමික කර්මාන්ත සහ සමාජ සවිබලගැන්වීමේ අමාත්‍යාංශය තුළ සිදුකෙරෙමින් තිබියදී මෙසේ අල්ලා ගැනීමට මැතිවරණ කොමිෂන් සභාව සමත් වී තිබෙනවා.

මැතිවරණ කොමිෂන් සභාවේ නිලධාරීන් එහි යන අවස්ථාව වන විට සමෘද්ධි අධ්‍යක්ෂ ජනරාල්වරයා ඇතුළු නිලධාරීන් පිරිසකුත් එම ශාලාව තුළ රැඳී සිටියා.

මැතිවරණ නිලධාරීන් එකී චෙක්පත් බෙදාදීම අත්හිටුවා තහනම් නියෝගයක් පනවා ඇති අතර චෙක්පත් ලබාගැනීමට පැමිණි සමෘද්ධි කළමනාකරුවන්ගෙන් හා සමෘද්ධි අධ්‍යක්ෂ ජනරාල්වරයාගෙන්ද සිද්ධිය සම්බන්ධයෙන් ප්‍රකාශ සටහන් කරගෙන ඇතැයි වාර්තා වනවා.

බත්තරමුල්ල “සුහුරුපාය” තුළ සමෘද්ධි අමාත්‍යාංශයට අදාළ සියලුම අංශවල නිලධාරීන්ගෙන් මැතිවරණ නිලධාරීන් ප්‍රකාශ සටහන් කර ගනිමින් ඊයේ සවස්වනතුරුම පුළුල් පරීක්ෂණයක් ක්‍රියාත්මක කළ බව දැනගන්නට ලැබෙනවා.

මෙසේ චෙක්පත් බෙදාදීම අදියර කිහිපයකින් සිදුකිරීමට සැලසුම් කර තිබුණු බව එකී පරීක්ෂණයේදී අනාවරණය වී තිබෙනවා.

මෙහිදී පත්වීම් ලිපි ඇතුලත් ෆයිල් කවර 20කට අධික සංඛ්‍යාවක් අත්අඩංගුවට ගැනීමට කටයුතු කර ඇති අතර එම කාර්යාලයේ කාමර කිහිපයක් සීල් තැබීමටද වැටලීම් කණ්ඩායම කටයුතු කළ බව සඳහන්.

අත්අඩංගුවට ගත් පත්වීම් ලිපි ‘සමෘද්ධි බැංකු පරිගණක නිලධාරි’ තනතුරට අදාළව සකස් කර තිබී ඇති අතර ඊට අදාළ ඉල්ලුම්පත්වල සඳහන් දිනයට කලින් දාතම යොදා පත්වීම් ලිපි සකසා තිබූ බවද මෙහිදී අනාවරණය වුනා.

මෙම ක්‍රියාවලියට සම්බන්ධ සමෘද්ධි අධිකාරියේ අධ්‍යක්ෂ ජනරාල්වරයාගේ පත්වීම කැබිනට් පත්වීමක් නිසා මැතිවරණ නීති උල්ලංඝනය කළ ඔහුගේ එම පත්වීම වහාම අවලංගු කරන ලෙස මැතිවරණ කොමිෂන් සභාව කැබිනට් මණ්ඩලය වෙත දැනුම්දීමටද තීරණය කර තිබෙනවා.

සමෘද්ධි අධ්‍යක්ෂ ජනරාල් එස්.ඊ.ආර්.ටී.එම්.එස්.පී. බණ්ඩාර මහතා, සමෘද්ධි හිමිකම්පත්‍ර ලක්ෂ අටක් මුද්‍රණය කර ඒවා බෙදාහැරීමට කටයුතු කරමින් සිටියදී මැතිවරණ කොමිෂන් සභාවේ නිලධාරීන් එහි ගොස් ඉකුත් සෙනසුරාදා දහවල් ඒවා අල්ලා ගනු ලැබුවා.

ඒ පිළිබඳව පරීක්ෂණ කටයුතු අද ආරම්භ කර තිබියදී සමෘද්ධි අධ්‍යක්ෂවරයා එම උණුසුම පහව යන්නටත් පෙර පැය 48ක් තුළ ඊයේ දෙවැනි මැතිවරණ නීති උල්ලංඝනය කිරීම සිදුකර ඇති බව මැතිවරණ කොමිෂන් සභාවේ ප්‍රකාශකයෙක් “මව්බිම”ට පැවැසුවා.

සමෘද්ධි අධ්‍යක්ෂ ජනරාල්වරයා විසින් සිදුකර ඇති මැතිවරණ නීති උල්ලංඝනය කිරීමේ සිද්ධීන් සම්බන්ධයෙන් පූර්ණ පරීක්ෂණ වාර්තාවක් රාජ්‍ය සේවා කොමිෂන් සභාවට සහ නීතිපතිවරයා වෙත ඉදිරිපත් කිරීමට මැතිවරණ කොමිෂන් සභාව කටයුතු කෙරෙමින් සිටින බවද එම ප්‍රකාශකයා සඳහන් කළා.

ජේ.ටී.ද සිල්වා