HUTCH තඹ වංචාවක | දේශීය තඹ කර්මාන්තකරුවන්ට මරු පහරක් දෙයි

හචින්සන් ටෙලිකොමිනිකේෂන් ලංකා පුද්ගලික සමාගම - හච් (Hutchison Telecommunications Lanka (Pvt) Ltd.- HUTCH) විසින් සිදුකරන ලද තඹ ජාවාරමක් සම්බන්ධයෙන් අපරාධ පරීක්ෂණ දෙපාර්තමේන්තුව පරීක්ෂණයක් ආරම්භ කර ඇතැයි වාර්තා වේ.

තඔ හා පිත්තල අපනයනය කිරීම නීති මගින් තහනම් කර තිබියදී, එවැනි තඹ වයර් තොගයක් අපනයනය කිරීම සඳහා හච් හි එඩේරමුල්ලේ පිහිටි ගුදමකින් ලොරි රථ දෙකකට පටවමින් තිබයදී පොලිසිය විසින් සිදු කළ වැටලීමකින් පසුව ලොරි රථ අත්අඩංගුවට ගෙන තිබේ.

මේ සිද්ධියෙන් පසුව අපරාධ පරීක්ෂණ දෙපාර්තමේතුව අදාළ පරීක්ෂණය ආරම්භ කර ඇතැයි වාර්තා වේ.

BOI ව්‍යාපෘති හෙවත්, ආයෝජන මණ්ඩලයේ අනුමැතිය ලත් ව්‍යාපෘති සඳහා එම සමාගම් ගෙන්වනු ලබන අබලි ද්‍රව්‍ය යළිත් තම රටතුළට ගෙනයාමේ අවසරක් ආයෝජන ප්‍රවර්ධන මණ්ඩලය විසින් ලබාදී ඇති අතර හච් හි නිලධාරීන් එවැනි සමාගමක් යොදා ගනිමින් මේ ඡාවාරම සිදුකර ඇති බව පැවසේ.

කෙසේවුවද, අබලි ද්‍රව්‍ය අපනයනය කිරීමට කටයුතු කිරීමට පෙර ඒවා මිලදී ගැනීමට දේශීය ගැනුම් කරුවකු සිටින්නේද යන්න පරික්ෂා කර බැලීම නීත්‍යානුකූල තත්ත්වයක් වුවද, මෙහිදී හච් ආයතනය ඒ කිසිවක් සිදුකර නොමැති බව මූලික පරීක්ෂණවලින් හෙළිව ඇති බව පැවසේ.

මෙහිදී විද්‍යුත් අපද්‍රව්‍ය ප්‍රතිචක්‍රීකරණය කරනු ලබන ආයතනය ලොරි රථ අත්අඩංගුවට ගැනීමට පැමිණි පොලිස් නිලධාරීන් මධ්‍යම පරිසර අධිකාරියේ ලිපියක් පෙන්වමින් නොමඟ යවා ඇති අතර, සිද්ධිය සැලවීමෙන් පසුව මධ්‍යම පරිසර අධිකාරිය විද්‍යුත් අපද්‍රව්‍ය ප්‍රතිචක්‍රීකරණය කරනු ලබන ආයතනයේ බලපත්‍රය අවලංගු කර ඇති බවද වාර්තා වේ.

රජය විසින් තඔ හා පිත්තල අපනයනය තහනම් කර ඇත්තේ ඒවා භාවිතා කර විවිධ කර්මාන්තවල යෙදෙන කුඩා කර්මාන්තකරුවන් ආරක්ෂා කර ගැනීම සඳහාය.

තඹ හා පිත්තල කුඩා කර්මාන්තකරුවන් විසින් නිෂ්පාදනය කරනු ලබන භාණ්ඩ විදේශීය වෙළඳ පොළට විකිණීම සිදුකරනු ලබයි.

මේ සිද්ධිය සම්බන්ධයෙන් තොරතුරු ලබා ගැනීම සඳහා අප හච් ආයතනයේ කළමනාකරු - සැපයුම් දාමය හා සැපයුම් කළමනාකරණ (Supply Chain And Logistics) ධමිත පෝරගේ මහතා සම්බන්ධකර ගැනීමට උත්සාහ කළද එය අසාර්ථක විය.

ඔහුට ඇමතුමක් ලබාදෙන ලෙස එම ආයතනයේ දුරකථන කළමනාකරු වෙත පණිවුඩයක්ද තැබුවද මෙතෙක් ඒ සඳහා පිළිතුරු නොලැබිණි.

-srilankamirror