බැසිල්ට සීට් එක දුන් කැටගොඩට ඔක්කොම එපා වෙයි!

බැසිල් රාජපක්ෂ මහතා හට පාර්ලිමේන්තුවට පිවිසීම සදහා සිය ජාතික ලයිස්තු මන්ත්‍රී ධුරය කැප කළ ජයන්ත කැටගොඩ මහතා හට ලබා දුන් සියලු තනතුරු ඒ මහතා විසින් ප්‍රතික්ෂේප කරනු ලැබ ඇති බව දැනගන්නට තිබේ.

ඒ අනුව රජය ඔහු වෙත ප‍්‍රදානය කරන ලද ඕස්ටේ‍්‍රලියානු මහකොමසාරිස් ධූරයද කැටගොඩ මහතා විසින් ප‍්‍රතික්ෂේප කරනු ලැබ ඇතැයි වාර්තා වේ.

ඕස්ටේ‍්‍රලියානු මහකොමසාරිස් ධූරයට අමතරව, තවත් ආයතන කිහිපයකටම නම යෝජනා කර තිබුණද තමන් ඒ සියල්ල ප්‍රතික්ෂේප කළ බව ජයන්ත කැටගොඩ ඬේලි මිරර් පුවත්පත හා පවසා ඇත.

මීට පෙර වාර්තා වූවේ, ශ‍්‍රී ලංකා රක්ෂණ සංස්ථාවේ සභාපති ධූරය සදහා ජයන්ත කැටගොඩ මහතා පත් කළ බවකි.

ඊට අදාළ පත්වීමේ ලිපිය මුදල් අමාත්‍යංශයේ ලේකම්වරයා විසින් කැටගොඩ වෙත යොමු කළ බවද වාර්තා විය.

කෙසේ වෙතත්, මෙතෙක් ඔහු වෙත යෝජනා කළ සියළු තනතුරු තමන් ප‍්‍රතික්ෂේප කළ බව කැටගොඩ පවසයි.

බැසිල් රාජපක්ෂ මහතා සමග එක්ව දේශපාලන ගමණක් යෑම තම අරමුණ බව පවසා ඇති ඒ මහතා, බැසිල් රාජපක්ෂ මහතා වෙනුවෙන් තම ජාතික ලයිස්තු මන්ත‍්‍රී ධූරය අත්හැරියේ කිසිදු පෞද්ගලික වාසියක් අපේක්ෂාවෙන් නොවන බවද පවසා තිබේ.